CHAK NOUVO TOUR YOL RON LAMARTINIK SA OUN APÈL DI LA NASYON KA ANPLIFYÉ.
Pierre CARPENTIER
Sa mo byen kontan di wè andan péyi mo frè Martiniké-ya, a par tan kannaval-a (ki li-menm sa oun tradisyon menen-vini-ya soti Lafrans poté pou nou, atè Laguiyàn osi), sé ki pèp-a ka roupran posésyon total di so lèspas géofizik, maritim ké otantikman kiltirel panan oun bèl simèn koté soley médiatik-a ka pété so limyèr asou bèl boté ka kléré nou, lò oun pèp ka rasanblé doubout pou proklamé, défann ké démontré tout latè-a sé ki moun ki mèt atè lapèrl dé Karayib.
Mo toubonman kontan di wè mannyè kouman lé Patron d'ékipaj ka sportivman dinamizé oun Apèl senbolik a la nasyon pou tout génėrasyon dépi toupiti jenn-jan ka viv bod lanmè, jouk gran moun tou laro morne Pérou ké Reculée douvan yé la télé.
Kanta pou mo menm sé pa ti vibré mo vibré pannan ti chofé prolog ayè-a, mé mo pa té kò wè anyen di tou lala ; sé soutou pronmyé étap jodla : Foyal-Anses d'Arlet ki stimilé mo adrénalin fò fò fò di vrè, ké "duel à la limite" lò kanno UFR/Chanflor pasé larivé-a jiskont douvan Rosette/Orange apré trwa zèr konbat' lanmè-a ké l'afrontman roch O Diamant-a.
Grémési pou sa vayan èspétak di fratèrnèl konpétisyon andan rivalité pou métrizé souvrènté maritim la Martinik !
Adonk toubyento dimen mo Kolèg-ya, pou mové dézièm étap-a an dirèksyon di zot intégral rouposésyon.
Soley'!